شوفت الفيديو؟
ده ستيفن جوبز صاحب شركة أبل للكمبيوترات والآيفون والآيبود.
أنا عايز أعلق كام تعليق كدا. عايز أحط فكرة أنه ساب الكلية لما ملقاش نفسه بيتعلم العلم اللى نفسه فيه. أنه عمل كدا وأنه عارف أنه بيكسر كلام أمه وأنه مش عارف حيعمل أيه بعد كدا. مجرد أنه لقى نفسه ماشى فى إتجاه مش عاجبه سابه وقرر يشق طريقه بنفسه. هو اللى عمله ده إيه؟ حماقة ولا جرأة؟ ثقة بالنفس؟ هو ماتكلمش كتير عن إحساسه وهو بياخد القرار وإكتفى التعبير عن الخوف أثناء إتخاذ القرار.
هو علق وقال إنك مينفعش ترسم طريقك من ورا لقدام. مينفعش تقيم صحة أو خطأ قرارتك المصيرية من دون أن تخوض التجربة. إنك لازم تستشير قلبك وتشوف أنت عايز تعمل إيه. بس إيه الجرأة ده؟ هل هى ده الطريقة للخوض فى هذه الحياة؟ انا معنديش رد على هذا السؤال بالرغم إنى دايما من مشجعى العفوية وأؤيد اللى يدور على حلمه ويمسكه بإيديه. بس فعلا هل العالم ممكن يمشى بهذا الأسلوب؟
النقطة التانية اللى أحب أعلق عليها هى كلامه عن المعانة اللى شافها لما ساب الكلية وطريقته فى وصفها وإنه استمتع بالمعاناة دي. أفتكرت أحد أساتذتى لما كان بيقول "هين نفسك" وما كنتش بفهم قوى قصده إيه. لما شفت ملامح وش السيد جوبز فهمت. إنك تكون مستمتع جدا بالحاجة بالرغم من إنك تعبان وإنت بتعملها. أكيد حتكون مبسوط لما تكون عارف إن الحاجة دى مسيرها توديك مكان أحسن من اللى أنت فيه.
لما أتعلم كتابة الخط وبالرغم من إنه داخل مجال ممكن الحاجة دى متنفعوش قوى، أو ده اللى إتهيأله فى الأول، وإزاى بعد كدا قدر يستخدم القدرة دى. عايز أفكّر نفسى إن مفيش حاجة ممكن تتعلمها مش مهمة. على الأقل حتغير طريقة تفكيرك.
لما أتطرد من شركته اللى بانيها بإيديه. حاجة زى كدا ممكن الواحد يموت فيها. بس فعلا ساعات الواحد بيحتاج أحداث كبيرة فى حياته عشان يتغير. ولازم لما يجيله موقف صعب يعرف إن ربنا عارف قدرة البنى آدم ده كويس عشان كدا جايبله إمتحان على مقاسه. .
بس لازم تعرف إن لو جوبز مكانش أتطرد من آبل مكانش حيبقى فيه توى ستورى 1، 2 و3.
وبص بقى بعد كل ده، يجيله سرطان فى البنكرياس. ده أكبر دليل على إن مهما خططت لحياتك دايما حيطلع لك خازوق ماكنتش عامله حساب. ولازم الواحد يعرف يستمتع بحياته مهما كانت الظروف. ولازم يعمل اللى هو عايزه مهما كانت الظروف.
من الجمل اللى عجبتنى وحنقلهم بدون تعليق:
Do what you believe is great work. Don't settle. Keep looking.
Stay hungry. Stay foolish.
فى الواقع آخر جملة ده حسأل عليها سؤال. إمتى الواحد ممكن يعتبر نفسه مكبل بالرفاهية؟
بأعتذر إذا كنت شايف إن مفيش كلام جديد فى التدوينة دى. ده شوية كلام فى دماغى.
بأعتذر أكتر عن الكتابة بالعامية. بقالى فو الشهر مكتبتش والطاسة مصديّة.
